ಗೊಂದಿಬಸವನಹಳ್ಳಿ ಗ್ರಾಮದ ಅರಣ್ಯ ಹಕ್ಕು ಸಮಿತಿಯ ಗ್ರಾಮಸಭೆ

ಕುಶಾಲನಗರ, ಸೆ 29: ಮುಳ್ಳುಸೋಗೆ ಗ್ರಾಪಂ ವ್ಯಾಪ್ತಿಯ ಗೊಂದಿಬಸವನಹಳ್ಳಿ ಗ್ರಾಮದ ಅರಣ್ಯ ಹಕ್ಕು ಸಮಿತಿಯ ಗ್ರಾಮಸಭೆ ಸಮಿತಿ ಅಧ್ಯಕ್ಷ‌ ಗೋವಿಂದಪ್ಪ ಅವರ ಅಧ್ಯಕ್ಷತೆಯಲ್ಲಿ ಗ್ರಾಮದ ಸರಕಾರಿ ಶಾಲಾ ಆವರಣದಲ್ಲಿ ನಡೆಯಿತು.ಮೀಸಲು ಅರಣ್ಯ ವ್ಯಾಪ್ತಿಯಲ್ಲಿ ವಾಸವಿರುವ ನಿವಾಸಿಗಳು ತಮ್ಮ ಜಾಗಗಳಿಗೆ ಖಾತೆ ಪಡೆದುಕೊಳ್ಳುವ ಸಂಬಂಧ ಸಲ್ಲಿಸಿದ ಅರ್ಜಿಗಳ ಬಗ್ಗೆ ಚರ್ಚೆ ನಡೆಯಿತು. ಸರಕಾರದ ಸೂಚನೆಯಂತೆ ವಿಭಾಗೀಯ ಮಟ್ಟಕ್ಕೆ ಸಲ್ಲಿಸಿದ 158 ಅರ್ಜಿದಾರರ ಪೈಕಿ ಸೂಕ್ತ ದಾಖಲಾತಿಗಳನ್ನು ಸಲ್ಲಿಸಿದ 9 ಮಂದಿ ಪಪಂಗಡ‌ದವರಿಗೆ ಹಕ್ಕು ಪತ್ರ ಮಂಜೂರಾಗಿರುವ ಬಗ್ಗೆ ಸಮಿತಿ ಕಾರ್ಯದರ್ಶಿಯಾದ ಗ್ರಾಪಂ ಪಿಡಿಒ ಸುಮೇಶ್ ಸಭೆಗೆ ಮಾಹಿತಿ ಒದಗಿಸಿದರು. ಪ.ಪಂಗಡ, ಪ.ಜಾತಿ‌ ಮತ್ತು ಸಾಮಾನ್ಯ ವರ್ಗದವರಿಗೆ ಪ್ರತ್ಯೇಕವಾಗಿ ನಿಗದಿಪಡಿಸಿರುವ ಮಾನದಂಡಗಳ ಅನುಗುಣವಾಗಿ ಒದಗಿಸಬೇಕಾದ ದಾಖಲೆಗಳ ವಿವರಗಳನ್ನು ಅವರು ಸಭೆಗೆ ಮಂಡಿಸಿದರು. ಸೂಕ್ತ ದಾಖಲಾತಿ, ಸಾಕ್ಷ್ಯಾಧಾರಗಳ ಮೇರೆಗೆ ಆಯ್ಕೆಯಾದವರಿಗೆ ಶೀಘ್ರದಲ್ಲಿ ಹಕ್ಕುಪತ್ರ ವಿತರಿಸಲಾಗುವುದು ಎಂದು ತಿಳಿಸಿದರು. ಅಗತ್ಯ ದಾಖಲೆಗಳ‌ ಪೈಕಿ ಪೂರ್ವಜರಿಗೆ ಸೇರಿದ 1930 ರ ಇಸವಿಯ ಹಿಂದಿನ ದಾಖಲಾತಿಗಳನ್ನು ಒದಗಿಸಲು ಕಷ್ಟವಾಗಿದ್ದು ಇದಕ್ಕೆ‌ ಪಯಾರ್ಯ‌ ಮಾರ್ಗ ಸೂಚಿಸುವಂತೆ ಕೆಲವು ಗ್ರಾಮಸ್ಥರು ಅಸಮಾಧಾನ ಹೊರಹಾಕಿದರು. ಇರುವಷ್ಟು ದಾಖಲೆಗಳನ್ನು ಒದಗಿಸಲಾಗಿದೆ. ಆದರೂ ಕಳೆದ ಮೂರು ದಶಕಗಳ ಬೇಡಿಕೆ ಈಡೇರಿಲ್ಲ ಎಂದು ಕೆಲವು ಗ್ರಾಮಸ್ಥರು ಆಕ್ರೋಷ ವ್ಯಕ್ತಪಡಿಸಿದರು. 158 ಅರ್ಜಿಗಳನ್ನು ವಿಭಾಗೀಯ ಮಟ್ಟಕ್ಕೆ ಪಂಚಾಯ್ತಿಯಿಂದ ಅನುಮೋದಿಸಿ‌ ಕಳುಹಿಸಿಕೊಡಲಾಗಿದೆ. ಆದರೆ ಸಮರ್ಪಕ ದಾಖಲಾತಿಗಳು‌ ಇಲ್ಲದೆ ಇರುವ ಕಾರಣ ಉಳಿದ‌ ಮಂದಿಯ ಅರ್ಜಿಗಳು ಮಾನ್ಯವಾಗದಿರುವ ಬಗ್ಗೆ ಪಿಡಿಒ ಸಭೆಯ ಗಮನಕ್ಕೆ ತಂದರು.

ಈ ಸಂದರ್ಭ ಮಾತನಾಡಿದ ಗ್ರಾಪಂ ಅಧ್ಯಕ್ಷ ಬಿ.ಕೆ.ಚೆಲುವರಾಜು, ಗ್ರಾಮ‌ ಪಂಚಾಯ್ತಿ ಮೂಲಕ ಗ್ರಾಮಕ್ಕೆ ಬೇಕಾದ ಹಲವು ಸೌಲಭ್ಯಗಳನ್ನು ಒದಗಿಸಲಾಗಿದೆ. ಹಕ್ಕುಪತ್ರ ಒದಗಿಸುವಲ್ಲಿ ಕೂಡ ಗ್ರಾಪಂ ಆಡಳಿತ ಮತ್ತು ಅಧಿಕಾರಿ ವರ್ಗ ಪ್ರಾಮಾಣಿಕ ಪ್ರಯತ್ನ‌‌ ನಡೆಸುತ್ತಿದೆ. ಶೀಘ್ರದಲ್ಲೇ ಗ್ರಾಮಸ್ಥರ ಬೇಡಿಕೆ ಈಡೇರಲಿದೆ ಎಂದು ತಿಳಿಸಿದರು.
ಅರಣ್ಯ ಹಕ್ಕು‌ ಸಮಿತಿ ಸದಸ್ಯರು ಆದ ಗ್ರಾಪಂ ಮಾಜಿ ಸದಸ್ಯ ಎಂ.ಎಂ.ಪ್ರಕಾಶ್ ಮಾತನಾಡಿ, ಗೊಂದಿಬಸವನಹಳ್ಳಿ ಸರ್ವೆ ನಂ 1/1 ರಲ್ಲಿ 250- 300 ಕುಟುಂಬಗಳು ವಾಸವಾಗಿವೆ. ಈ ಪ್ರದೇಶ ಮೀಸಲು ಅರಣ್ಯಕ್ಕೆ ಸಂಬಂಧಿಸಿದ್ದು ಎನ್ನಲಾಗಿ ಹಕ್ಕುಪತ್ರಕ್ಕಾಗಿ ಹಲವು ದಶಕಗಳಿಂದ ಶ್ರಮಿಸಲಾಗುತ್ತಿದೆ. ಇದಕ್ಕಾಗಿ ಗ್ರಾಮ ಅರಣ್ಯ ಹಕ್ಕು ಸಮಿತಿ ರಚಿಸಿಕೊಂಡು ಹೋರಾಡಲಾಗುತ್ತಿದ್ದು ಕೆಲವೊಂದು ದಾಖಲಾತಿಗಳ‌ ಕೊರತೆಯಿಂದ 149 ಮಂದಿಗೆ ಹಕ್ಕುಪತ್ರ‌ ನಿರಾಕರಿಸಲಾಗಿದ್ದು ಶೀಘ್ರದಲ್ಲೇ ಇದನ್ನು ಸರಿಪಡಿಸಿಕೊಂಡು‌ ವಿಭಾಗಾಧಿಕಾರಿಗಳನ್ನು ಭೇಟಿಯಾಗುವುದಾಗಿ ತಿಳಿಸಿದರು.
ಈ ಸಂದರ್ಭ ಗ್ರಾಪಂ ಸದಸ್ಯರಾದ ಜಿ.ಬಿ.ಜಗದೀಶ್, ಕಾಂಚನಾ, ಮಲ್ಲಿಗೆ, ಮುರಳಿ, ಆಸಿಫ್, ಮಣಿ, ಕಾರ್ಯದರ್ಶಿ ಮಂಜುನಾಥ್, ಅರಣ್ಯ ಹಕ್ಕು‌ ಸಮಿತಿ ಸದಸ್ಯರಾದ ಜಯಶಂಕರ್, ಮೀನಾ, ನಾಗರಾಜು,
ಅರಣ್ಯ, ಕಂದಾಯ ಇಲಾಖೆ ಪ್ರತಿನಿಧಿಗಳು ಸೇರಿದಂತೆ ಗ್ರಾಮಸ್ಥರು ಇದ್ದರು.