ಮಾದಾಪಟ್ಟಣದಲ್ಲಿ ನಾಯಿಗಳ‌ ಮೇಲೆ ವಾಹನ ಚಲಾಯಿಸಿ ಕ್ರೌರ್ಯ: ಆರೋಪಿ ವಶಕ್ಕೆ

ಕುಶಾಲನಗರ, ಜೂ 24: ಕುಶಾಲನಗರದ ಮಾದಾಪಟ್ಟಣದ ಕಾಶಿ ವಿಶ್ವನಾಥ ದೇವಾಲಯ ಬಳಿ ರಸ್ತೆಯಲ್ಲಿ‌‌ ಮಲಗಿದ್ದ 5 ನಾಯಿಗಳ ಮೇಲೆ ನೀಚನೊಬ್ಬ ಜೀಪು ಚಲಾಯಿಸಿ ಗಾಯಗೊಳಿಸಿದ ಘಟನೆ ನಡೆದಿದೆ.

ಘಟನೆಯಲ್ಲಿ ಮೂರು ನಾಯಿಗಳಿಗೆ ಸೊಂಟಕ್ಕೆ ತೀವ್ರ ಘಾಸಿಯಾಗಿದೆ. ಈ ಕೃತ್ಯ ಸಿಸಿ ಕ್ಯಾಮೆರದಲ್ಲಿ ಸೆರೆಯಾಗಿತ್ತು. ಈ ಸಂಬಂಧ ದಿಲೀಪ್ ಎಂಬವರು ಕುಶಾಲನಗರ ಟೌನ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದರು. ನಮ್ಮ ಒಂದು ಸಾಕು ನಾಯಿ ಜೊತೆಗೆ ಇತರೆ 4 ಬೀದಿ ‌ನಾಯಿಗಳು ರಸ್ತೆಯಲ್ಲಿರುವುದನ್ನು ಕಂಡರೂ ಹಾರ್ನ್ ಮಾಡದೆ ಉದ್ದೇಶಪೂರ್ವಕವಾಗಿ ಜೀಪು ಹರಿಸಿ ನಾಯಿಗಳ ಅಂಗಾಂಗ ಊನಗೊಳಿಸಲಾಗಿದೆ ಎಂದು ದೂರಿನಲ್ಲಿ ಉಲ್ಲೇಖಿಸಲಾಗಿದೆ.
ಘಟನೆ ಸಂಬಂಧ ಜೀಪ್ ಚಾಲಕ ಮಾದಾಪಟ್ಟಣ ನಿವಾಸಿ ಬಾಪುಟ್ಟಿ ಎಂಬವರ ಪುತ್ರ ಅಲಿ ಎಂಬಾತನನ್ನು ವಶಕ್ಕೆ ಪಡೆಯಲಾಗಿದೆ.