ಕುಶಾಲನಗರ, ಮಾ 22: ಕಾಫಿ ತೋಟದಲ್ಲಿ ಕೆಲಸದಲ್ಲಿ ನಿರತನಾಗಿದ್ದ ಕಾರ್ಮಿಕನ ಮೇಲೆ ಕಾಡಾನೆ ದಾಳಿ ನಡೆಸಿ ಗಂಭೀರವಾಗಿ ಗಾಯಗೊಳಿಸಿದ ಘಟನೆ ನೆಲ್ಯಹುದಿಕೇರಿ ಗ್ರಾಮದ ಅತ್ತಿಮಂಗಲ ಖಾಸಗಿ ಕಾಫಿ ತೋಟದಲ್ಲಿ ನಡೆದಿದೆ.
ತಮಿಳುನಾಡು ಸೇಲಂ ಮೂಲದ ಅಣ್ಣಾಮಲೈ(50) ಗಾಯಗೊಂಡ ಕಾರ್ಮಿಕ. ಶುಕ್ರವಾರ ಕಾಫಿ ತೋಟದಲ್ಲಿ ಕಾರ್ಮಿಕರು ಕಾಳುಮೆಣಸು ಕೊಯ್ಲು ಸಂದರ್ಭ ಏಕಾಏಕಿ ಒಂಟಿ ಸಲಗ ಪ್ರತ್ಯಕ್ಷ ಗೊಂಡಿದೆ. ಕಾಡಾನೆಯನ್ನು ಕಂಡ ಕಾರ್ಮಿಕರು ಪರಾರಿಯಾದರೆ ಏಣಿಯ ಮೇಲಿದ್ದ ಅಣ್ಣಾಮಲೈ ಎಂಬಾತನನ್ನು ಕಾಡಾನೆಯು ಎಳೆದು ಕೆಳಗೆ ಕೆಡವಿ ದಂತದಿಂದ ಕಾಲಿನ ತೊಡೆಯ ಭಾಗಕ್ಕೆ ತಿವಿದು ಘಾಸಿಗೊಳಿಸಿದೆ. ಕಾರ್ಮಿಕರ ಚೀರಾಟದಿಂದ ಕಾಡಾನೆ ಸ್ಥಳದಿಂದ ಕಾಲ್ಕಿತ್ತಿದೆ. ಗಾಯಗೊಂಡ ಅಣ್ಣಾಮಲೈ ನನ್ನು ಸಿದ್ದಾಪುರ ಸಮುದಾಯ ಆರೋಗ್ಯ ಕೇಂದ್ರದಲ್ಲಿ ಪ್ರಾಥಮಿಕ ಚಿಕಿತ್ಸೆ ಕೊಡಿಸಿ ಹೆಚ್ಚಿನ ಚಿಕಿತ್ಸೆಗೆ ಮಡಿಕೇರಿಗೆ ದಾಖಲಿಸಲಾಗಿದೆ.
error: Content is protected !!
