ಕುಶಾಲನಗರ, ಮಾ 17: ಸ್ವಚ್ಚತಾ ಅಭಿಯಾನಕ್ಕೆ ಸಹಕಾರವಾಗಿ ಫೆಡರಲ್ ಬ್ಯಾಂಕ್ ಕುಶಾಲನಗರ ಶಾಖೆ ವತಿಯಿಂದ ಕುಶಾಲನಗರ ಪುರಸಭೆಗೆ ಗೂಡ್ಸ್ ವಾಹನ ಕೊಡುಗೆ ನೀಡಲಾಯಿತು. ಶಾಖೆಯ 11ನೇ ವಾರ್ಷಿಕೋತ್ಸವ ಅಂಗವಾಗಿ ಸಿಎಸ್ಆರ್ ಯೋಜನೆಯಡಿ ಹೊಸ ಬೊಲೆರೋ ಪಿಕ್ ಅಪ್ ವಾಹನ ಕೊಡುಗೆ ನೀಡಲಾಯಿತು. ಶಾಖೆಯಲ್ಲಿ ನಡೆದ ಕಾರ್ಯಕ್ರಮವನ್ನು ಬ್ಯಾಂಕಿನ ಸಂಸ್ಥಾಪಕ ದಿ.ಹಾರ್ಮಿಸ್ ಅವರ ಭಾವಚಿತ್ರಕ್ಕೆ ದೀಪ ಬೆಳಗುವ ಮೂಲಕ ಶಾಸಕ ಅಪ್ಪಚ್ಚುರಂಜನ್ ಉದ್ಘಾಟಿಸಿದರು. ನಂತರ ಮಾತನಾಡಿದ ಅವರು, ಸ್ವಚ್ಚತಾ ಅಭಿಯಾನಕ್ಜೆ ಕೈಜೋಡಿಸಿರುವ ಫೆಡರಲ್ ಬ್ಯಾಂಕ್ ನೀಡಿರುವ ಕೊಡುಗೆ ಶ್ಲಾಘಿಸಿದರು. ಪ್ರತಿಯೊಬ್ಬರೂ ಕೂಡ ಸ್ವಚ್ಚತೆಗೆ ಹೆಚ್ಚಿನ ಒತ್ತು ನೀಡಬೇಕು. ಇಂದಿನ ದಿನಗಳಲ್ಲಿ ಸರಳ ಪ್ರಕ್ರಿಯೆಗಳ ಮೂಲಕ ಸಾಲ ಸೌಲಭ್ಯ ದೊರಕುತ್ತಿದ್ದು ಗ್ರಾಹಕರು ಇದರ ಸದುಪಯೋಗ ಪಡೆದುಕೊಂಡು ಸಕಾಲದಲ್ಲಿ ಸಾಲ ಮರುಪಾವತಿಸಿ ಬ್ಯಾಂಕಿನ ಅಭಿವೃದ್ದಿಗೆ ಕೂಡ ಸಹಕರಿಸಬೇಕಿದೆ ಎಂದರು.
ಮುಖ್ಯ ಅತಿಥಿಗಳಾಗಿ ಪಾಲ್ಗೊಂಡಿದ್ದ ಪುರಸಭೆ ಅಧ್ಯಕ್ಷ ಬಿ.ಜೈವರ್ಧನ್ ಮಾತನಾಡಿ, ಫೆಡರಲ್ ಬ್ಯಾಂಕ್ ಕೊಡುಗೆ ನೋಡಿರುವ ವಾಹನವನ್ನು ಸದ್ಬಳಕೆ ಮಾಡಿಕೊಳ್ಳುವುದಾಗಿ ತಿಳಿಸಿದರು.
ಬ್ಯಾಂಕಿನ ರೀಜನಲ್ ಹೆಡ್ ವಿ.ಸಿ.ರಾಜೀವ್ ಹಾಗೂ ಕುಶಾಲನಗರ ಶಾಖೆಯ ವ್ಯವಸ್ಥಾಪಕ ಎಂ.ಎನ್.ವಿನೋದ್ ಮಾತನಾಡಿದರು.
ಇದೇ ಸಂದರ್ಭ ವಾಹನದ ಕೀಯನ್ನು ಪುರಸಭೆಗೆ ಹಸ್ತಾಂತರ ಮಾಡಿ ವಾಹನವನ್ನು ಪುರಸಭೆ ಸುಪರ್ದಿಗೆ ವಹಿಸಲಾಯಿತು.
ಕಾರ್ಯಕ್ರಮದಲ್ಲಿ ಪುರಸಭೆ ಉಪಾಧ್ಯಕ್ಷೆ ಸುರಯ್ಯಭಾನು, ಮುಖ್ಯಾಧಿಕಾರಿ ಶಿವಪ್ಪ‌ನಾಯಕ್, ಸದಸ್ಯರಾದ ಜಗದೀಶ್, ಅಮೃತ್‌ರಾಜ್, ವಿ.ಎಸ್.ಆನಂದಕುಮಾರ್, ಡಿ.ಕೆ.ತಿಮ್ಮಪ್ಪ, ಕೆ.ಜಿ.ಮನು, ಶೈಲಾ ಕೃಷ್ಣಪ್ಪ, ಜಯಲಕ್ಷ್ಮಿ, ಕುಡಾ ಅಧ್ಯಕ್ಷ ಎಂ.ಎಂ.ಚರಣ್, ಉದ್ಯಮಿಗಳಾದ ಜೆಮ್ಸಿ ಪೊನ್ನಪ್ಪ, ರಾಯ್, ಪ್ರಮುಖರಾದ ಉಮಾಶಂಕರ್, ವೈಶಾಖ್, ಪ್ರವೀಣ್, ಮಧುಸೂದನ್, ಬ್ಯಾಂಕ್ ಸಿಬ್ಬಂದಿಗಳಾದ ಬಿ.ಆರ್.ವರುಣ್, ದಿಲೀಪ್, ಸ್ವರಶ್ರೀ, ಫ್ಯಾಬಿನ್, ಸಂತೋಷ್ ಮತ್ತಿತರರು ಇದ್ದರು.
