ಸಹಕಾರ ಸಂಘದಲ್ಲಿ ರಾಜಕೀಯ ನುಸುಳಬಾರದು: ನಮ್ಮ ಸಾಧನೆಗೆ ಮತದಾರರು ಬೆಂಬಲಿಸಿದ್ದಾರೆ: ಶರವಣಕುಮಾರ್

ಕುಶಾಲನಗರ, ಜ 19: ಕುಶಾಲನಗರದ ಕೈಗಾರಿಕೋದ್ಯಮಿಗಳ ಮತ್ತು ವೃತ್ತಿನಿರತರ ವಿವಿಧೋದ್ದೇಶ ಸಹಕಾರ ಸಂಘದ ಚುನಾವಣೆಯಲ್ಲಿ ಹಾಲಿ ಅಧ್ಯಕ್ಷರಾದ ಟಿ.ಆತ್.ಶರವಣಕುಮಾರ್ ನೇತೃತ್ವದ ತಂಡ ಜಯಗಳಿಸಿದೆ. ಮತ ಎಣಿಕೆ‌ ಪ್ರಕ್ರಿಯೆ ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದ ಟಿ.ಆರ್.ಶರವಣಕುಮಾರ್, ಸಹಕಾರ ಸಂಘದಲ್ಲಿ ರಾಜಕೀಯ ಪ್ರವೇಶಿಸಿದರೆ ಅಂತಹ ಸಂಘ ಅಭಿವೃದ್ಧಿ ಹೊಂದುವುದು ಕಷ್ಟ. ನಾವು ಕಳೆದ 20 ವರ್ಷಗಳಿಂದ ಪಕ್ಣಾತೀತವಾಗಿ, ರಾಜಕೀಯ ರಹಿತ ವ್ಯವಸ್ಥೆ ಮೂಲಕ ಸಂಘವನ್ನು ಅಭಿವೃದ್ಧಿ ಪಥದಲ್ಲಿ‌ ಮುನ್ನಡೆಸಿದ್ದೇವೆ. ಜಿಲ್ಲೆಯಲ್ಲಿಯೇ ಅತ್ಯಂತ ಯಶಸ್ವಿ, ಮಾದರಿ ಸಹಕಾರ ಸಂಘವಾಗಿ ಐಪಿಎಂಸಿಎಸ್ ಅನ್ನು ಬೆಳೆಸಿದ್ದೇವೆ. ಈ ಬಾರಿ ಬಿಜೆಪಿ ಪಕ್ಷದಿಂದ ಅಭ್ಯರ್ಥಿಗಳನ್ನು ಕಣಕ್ಕಿಳಿಸಿದ್ದು ಸೂಕ್ತ ಅಭ್ಯರ್ಥಿಗಳೇ ಸಿಗದೆ ಕೆಲವು ಮಂದಿ ಸ್ಪರ್ಧಿಸಿ ನಮ್ಮ ವಿರುದ್ದ ಅಪಪ್ರಚಾರ ನಡೆಸಿದರೂ ಕೂಡ ನಮ್ಮ ಸಾಧನೆ ಗುರುತಿಸಿ ಮತದಾರರು ಕೈಹಿಡಿದಿದ್ದಾರೆ. ಮುಂದೆಯೂ ಕೂಡ ರಾಜಕೀಯ ರಹಿತವಾಗಿ ಸಂಘ ಹಾಗೂ ಸದಸ್ಯರ ಅಭಿವೃದ್ಧಿಗೆ ಕಾರ್ಯಯೋಜನೆ ರೂಪಿಸಲಿದ್ದೇವೆ ಎಂದರು.