ಚಿತ್ರಕಲೆ, ಪ್ರಬಂಧ ,ರಸಪ್ರಶ್ನೆ, ಭಾಷಣ ಸ್ಪರ್ಧೆಯಲ್ಲಿ ವಿಜೇತರಾದವರಿಗೆ ಬಹುಮಾನ ವಿತರಣಾ ಕಾರ್ಯಕ್ರಮ

ಕುಶಾಲನಗರ, ಜ 31: ಕುಶಾಲನಗರದ ರಂಗ ಭಾರತಿ ಕಲಾಮಂದಿರಮ್ ಮತ್ತು ವಾಸವಿ ಯುವಜನ ಚಾರಿಟಬಲ್ ಟ್ರಸ್ಟ್ ಸಹಯೋಗದಲ್ಲಿ ಅಯೋಧ್ಯ ಶ್ರೀ ಬಾಲರಾಮನ ಪ್ರಾಣಪ್ರತಿಷ್ಠಾಪನ ವಾರ್ಷಿಕೋತ್ಸವದ ಅಂಗವಾಗಿ *ಭಾರತ ದರ್ಶನ* ಎಂಬ ಶೀರ್ಷಿಕೆಯಡಿ ರಾಮಾಯಣ ಮಹಾಭಾರತ ಹಾಗೂ ಭಾರತದ ಸಂಸ್ಕೃತಿಯನ್ನಾದರಿಸಿ ಶಾಲಾ ಮಕ್ಕಳಿಗೆ ದಿನಾಂಕ 16.01.2025 ರಂದು ಏರ್ಪಡಿಸಿದ್ದ ಚಿತ್ರಕಲೆ, ಪ್ರಬಂಧ ,ರಸಪ್ರಶ್ನೆ, ಭಾಷಣ ಸ್ಪರ್ಧೆಯಲ್ಲಿ ವಿಜೇತರಾದವರಿಗೆ  ಬಹುಮಾನ ವಿತರಣಾ ಕಾರ್ಯಕ್ರಮ ಗಾಯತ್ರಿ ಸಭಾಂಗಣದಲ್ಲಿ ನಡೆಯಿತು.

ಕಾರ್ಯಕ್ರಮವನ್ನು ಉದ್ಯಮಿ ಎಂ.ಕೆ. ದಿನೇಶ್ ಉದ್ಘಾಟಿಸಿದರು. ಅತಿಥಿಯಾಗಿ ಪಾಲ್ಗೊಂಡಿದ್ದ  ಆದಿಶಿಲಾ ಸಂಸ್ಥೆಯ ಆಡಳಿತ ನಿರ್ದೇಶಕ ಶಶಾಂಕ್, ಮಕ್ಕಳಿಗೆ ಕಲೆಯ ಮೂಲಕ ಸೃಜನಶೀಲತೆಯನ್ನು ಬೆಳೆಸಿಕೊಳ್ಳಬೇಕು ಹಾಗೂ ಮಕ್ಕಳು ಕೇವಲ ವಿದ್ಯಾವಂತರಾದರೆ ಸಾಲದು , ಸಂಸ್ಕಾರವಂತರಾಗಬೇಕು ಎಂದು ಕಿವಿಮಾತು ಹೇಳಿದರು.

ಕಾರ್ಯಕ್ರಮದಲ್ಲಿ ವಾಸವಿ ಯುವಜನ ಚಾರಿಟಬಲ್ ಟ್ರಸ್ಟ್ ಉಪಾಧ್ಯಕ್ಷ ವೈಶಾಖ್ ರಂಗಭಾರತಿ ಟ್ರಸ್ಟಿಗಳಾದ ಜನಾರ್ಧನ, ಅಮೃತ್ ರಾಜ್,  ನವ್ಯಾ , ದೀಪ ಸುರೇಂದ್ರ ಹಾಗೂ ಮಹೇಶ್ ಅಮೀನ್  ಉಪಸ್ಥಿತರಿದ್ದರು.

ಸ್ಪರ್ಧೆಯಲ್ಲಿ ಭಾಗವಹಿಸಿದ್ದ ಎಲ್ಲಾ ಮಕ್ಕಳಿಗೂ ಅಭಿನಂದನಾ ಪತ್ರಗಳನ್ನು ನೀಡಲಾಯಿತು.

ಚಿತ್ರಕಲೆ ವಿಭಾಗದಲ್ಲಿ ಉದ್ಗಮ್ ಶಾಲೆಯ ವಿದ್ಯಾರ್ಥಿ ಜಗನ್ನಾಥನ್, ( 5 ರಿಂದ 7ನೇ ತರಗತಿ ವಿಭಾಗ) ಹಾಗೂ ಬಾಲಕಿಯರ ಸರ್ಕಾರಿ ಪ್ರೌಢ ಶಾಲೆಯ ವಿದ್ಯಾರ್ಥಿನಿ ಸ್ನೇಹ ಸಿ ಡಿ (8 ರಿಂದ 10ನೆ ತರಗತಿ ವಿಭಾಗ) ಪ್ರಥಮ ಬಹುಮಾನ ಪಡೆದಿದ್ದಾರೆ. ರಸಪ್ರಶ್ನೆ ವಿಭಾಗದಲ್ಲಿ ಶಾಂತಿ ನಿಕೇತನ ಶಾಲೆ ಪ್ರಥಮ ಸ್ಥಾನ ಹಾಗೂ ಭಾಷಣ ಸ್ಪರ್ಧೆ ಯಲ್ಲಿ ಉದ್ಗಮ್ ಶಾಲೆಯ ವಿದ್ಯಾರ್ಥಿನಿ ಸಾಯಿ ನಿಹಿರಾ ,( 1ರಿಂದ 4ನೆ ವಿಭಾಗ) ಹಾಗೂ ಶಾಂತಿನಿಕೇತನ ಶಾಲೆಯ ವಿದ್ಯಾರ್ಥಿನಿ ದಕ್ಷಿತಾ ಗೌಡ ಎನ್ ,( 5ರಿಂದ 7ನೆ ವಿಭಾಗ) ಪ್ರಥಮ ಬಹುಮಾನ ಪಡೆದಿರುತ್ತಾರೆ.